LASKATI: Isa ka Sugilanon

sinulat ni Edgar Siscar

Sang 1945, matapos ang Liberation, may mga Amerikano pa nga nabilin sa Pavia nga nagapanghimos sang ila mga tolda kag mga gamit tuhoy sa giyera. Sang isa ka adlaw, si Anhing Polding nga sarhento sang US Army naghagad kay Captain Buchner nga manyaga sa ila balay nga malapit lang sa kampo. May binakol, sinugba nga tuloy, paho, kag ginulot nga baboy sia nga ginhanda para sa mga katapo sang contingent nga nabilin.

May langgawan man didto si Manong Polding sa botelya sang Johnny Walker nga nasudlan man sang mga katumbal, luy-a, ahus kag langkawas. Agud maganahan ang iya mga bisita, ginbutangan niya sang yahong kag ihuwad ang unod sang nasambit nga botelya, sawsawan sang ila sulod-anon.

Sang isawsaw ni Captain Buchner kag ihamal ang sinugba sa iya baba, namutikan niya nga makahang ang pagkaon. Ginpamalhas sia. Nadumdoman niya ang Alaska kon sa diin sia nadestino sang una. Didto sa Alaska masami nga matugnaw kag kinahanglanon ang mga makahang nga pagkaon agud balhason sia. Gin-uyatan ni Captain Buchner ang botelya nga nasudlan sang langgaw kag mga katumbal, ginhimutaran ini sing maayo kag nagsiling kay Manong Polding, “Hey, man, is this Alaska Tea?”

Madamo nga katapo sang panimalay ang nakabati sang ginsambit ni Captain Buchner. Ang pamati nila sang Alaska Tea, “Laskati.” Gikan didto nangin ‘Laskati’ ang tawag nila sang botelya nga may unod nga langgaw, katumbal, luy-a, kag ahus.

Bilang pasidungog kay Captain Buchner, ginhingadlan ni Manong Polding ang iya ido nga ‘Buchner’.

[tinipik sg mga sinulatan nga gintipon ni Ginoong Edgar Siscar sa Pahina’ Hiligaynon]

Advertisements

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s