ANG KAHIMTANGAN NIAN SANG PULONG’ HILIGAYNON

ni Edgar H. Siscar

Edgar Siscar, PH Admin

Tag-sulat

Hiligaynon, masami nga ginatuhoy nga Ilonggo, isa ka Austronesian nga pulong nga ginasambit sa Kabisay-an Nakatundan sang pungsod Pilipinas.

Kadam-an sang nagagamit sang Hiligaynon yara sa mga puod sang Iloilo, Negros Occidental kag Capiz apang ginasambit man ini sa iban pa gid nga puod sang kapuloan sang Panay lakip na diri ang Antique, Aklan, Guimaras, kag sa madamo nga bahin sang Mindanao lakip ang dakbanwa sang Koronadal, Nabagatnan nga Cotabato, Sultan Kudarat kag mga bahin sang Naaminhan nga Cotabato. Dugang pa gid, ginasambit man ini bilang ikaduha nga pulong sang mga tumandok nga nagagamit sang pulong nga Kinaray-a sa puod sang Antique, sang mga Aklanon kag Malaynon sa Aklan, sang mga Cebuano sa Siquijor, kag sang mga Capiznon sa Capiz.

Kapin ukon kulang sa 7,000,000 ka mga tao sa luwas sang pungsod Pilipinas ang tumandok nga nagasambit sang pulong Hiligaynon, kag may dugang pa gid nga 4,000,000 ka mga tinuga nga may ikasangkol sa pagsambit sing matalunsay nga Hiligaynon.

Ang Hiligaynon nga pulong katapo sang panimalay sang Bisaya nga mga pulong. Pinasahi ini nga pulong sangsa iban nga Pilipinhon nga pulong bangud sang iya malagway kay may maambahanon nga tuno kasubong sang pulong nga Italiano, particularmente ang Bacolodnon nga Hiligaynon, ini nga kapinasahi naggikan sa mga ‘mestizos de sangley’ ukon mestizo nga mga Intsik sa Kabisay-an nga rehiyon.

Ang kinalain sang ‘Ilonggo’ kag sang Hiligaynon amo ini: Ang Ilonggo amo ang ‘ethnolinguistic group’ ukon mga katawhan nga tumandok ukon mga katawhan nga nabaid sa kultura kag pagsinalayo nga Ilonggo, ukon ang mga pumoluyo sang Panay kag sang palibot nga mga duog nga nagagamit sang pulong Hiligaynon.

Ang pulong Hiligaynon amo ang pulong nga ginasambit sang mga Ilonggo, ukon sang mga katawhan nga nakahangop sini nga pulong kag makahibalo sing may katalunsay sa paggamit sini.

Nian ang pulong Hiligaynon nasamayan na sang iban pa gid nga pulong lakip na diri ang Espanyol (cabesa, libro, bestida), Ingles (hamburger), Italiano (spaghetti), Alimanya (bolkswagin), Pransis (French fries) kag iban pa gid nga pulong sang mga pungsod nga nian ginasayuhan na sang mga tumandok nga Pilipinhon. Ini tanan sanglit ang pulong’ Hiligaynon buhi nga pulong nga padayon nga nagahumwad kag nagapakigkabuhi sa iban pa gid nga mga pulong.

Ang aton mga katigulangan may pagpati nga ang KINARAY-A amo ang iloy nga pulong sang pulong’ HILIGAYNON. Apang sayop ini sanglit magkatuhay ang duha ka pulong sa idalom sang bunghay sang mga Visayan nga pulong.

[nagikan sa: PAHINA’ HILIGAYNON]

Advertisements

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s