(Sa adlaw sg tanan nga mga nanay, nagdihon ako sg isa ka binalaybay halad ko sa amon nga mapinalangaon nga Iloy)
Iloy nga Bulawanon sg Tagipusoon
sinulat ni Gil CamporazoIloy namon nga bulawanon sg tagipusoon
Sa imo kami naghalin
sa imo pagbatiti kag pag-utitid
kami nagdalagku kag nag-uswag
bangud sa imo nga wala sang katulad
nga pagpalangga.Iloy namon nga bulawanon sg tagipusoon
sa imo pagbatas kag pag-antus
sang tanan nga gumongtang
sa imo kabuhi nga indi mapahimtang
sg tanan nga mga problema
halos dugo na lang ang imo iluha sa imo mga mata.Iloy namon nga bulawanon sg tagipusoon
tanan kami nga mag-ulotod
imo ginsagod kag ginpatuon
bisan imol lamang kita
pero imo gid gintinguhaan
kami tanan makatapos sa amon pag-eskwela.Iloy namon nga bulawanon sg tagipusoon
wala kami sg nawong nga ipakita sa imo
kay kalabanan sa amon wala katapos sa pagbutho
kami nga salawayon nga imo mga anak
Ugani patawad iloy namon
kami nagahinulsol sg amon mga kasal-anan.Iloy namon nga bulawanon sg tagipusoon
ikaw nagtaliwan kag kami imo binayaan
daku ang amon pagkahalanusbo
sg kasubo tuga sg imo pagkawala sa amon.
Bisan wala ka na ikaw sa gihapon nagapabilin
sa amon tagipusoon kag sa amon panghunahuna.Iloy namon nga bulawanon sg tagipusoon
bisan kuarta o bulawan indi ikaw mabayaran
sg imo katampad kag putli nga pagpalangga
sg imo wala katapusan nga pagtamod sa amon
sg imo nga wala sg tupong nga pag-antus
kami lamang mahatagan sg kasulhayan.Iloy namon nga bulawanon sg tagipusoon
sa sini nga tinion ikaw amon pagahandurawon
palangga namon nga iloy
sa adlaw sg mga iloy
ikaw amon itib-ong kag pasidunggan
lab-ot sa kalangitan ang pagpasalamat namon.
Category Archives: Binalaybay
Anhon Ko? Sa Pihak sang Tanan
Ang duha ka binalaybay
ni Nonoy Alacapa (aka Ladolpho, 94.3iFM)
1. ANHON KO?
Indi ko lang gusto
Masakitan ang balatyagon ko
Gani ako na lang ang mapalayo
Antis naman ang mga luha ko magtinulo.
Piliton ko nga kalimtan ka
Bisan pa nga ikaw lang gid ang
Akon ginahigugma,
Tungod indi ko na maagwanta
Ang tanan nga panghusga
Indi kita para sa isa kag isa
Gani bisan indi ko gusto
Bisan gapamatok ang tagipuso-on ko
Dapat nga ako na lang ang malakat… mismo.
Kanugon sang isa ka kahapon
Nga puno sang mga duag kag ambahanon
Akon na lang ini tanan nga handurawon
Bisan masakit pa ini para sa akon.
Amat-amat ko na lang nga batunon
Ikaw abi ang pinaka-importante nga bahin
Sang akon kahapon
Gani kun sa diin ka man subong
Tani ini nga panalambiton…
Imo man nga pagahakson.
2. SA PIHAK SANG TANAN
Masakit man nga batyagon
Nga wala ka guid sang pagtamod sa akon
Batunon ko na lang sa guihapon
Bisan pa nga ginpilasan mo
Ang akon tagipuso-on.
Tampad nga paghigugma ko sa imo
Ikaw pa gani ang naging inspirasyon ko.
Ang ginhimo nga modelo
Tungod ikaw man ang akon idolo
Apang sa pihak sang tanan
Dapat ko man batonon ang kamatuoran
Ikaw kag ako…
Asta lang sa paging mag-abyan.
Ginapalangga ta ka…
Sobra-sobra…
Magahod!!!
Makatilingil!!!
Makatilingala!!!
Gani ang pamangkot…
Nga-a ikaw pa?
N.B.: Ini tanan nabalhag sa Negros Daily Bulletin, February 18-19,2012
Ang Gugma nga daw Munggo
binalaybay ni Peter Solis Nery
Kon ang akon kalangkag
Nagamuad sa akon dughan
Nga daw munggo nga ginhuluman
Nagatangla ako sa langit
Kag nagapangamuyo
Nga kuntani magbundak ang ulan
Nga kuntani kis-a mo pa
Mamulalungan ang akon mga mata
Nga halos malumos, halos kapulan
Sang tuman nga kapung-aw
Pagahandurawon ko ikaw
Sa sining kalibutan, sa damgo
Kag sa iban pa nga mga kalibutan
Kay paano ko malimtan ang binhi
Nga ginsabwag mo sa akon dughan?
Ang gugma nagapanalingsing
Kasubong sang sublak nga nagapanginyawat
Kag nagapatambok sa akon kalangkag.
© Peter Solis Nery, Prince of Ngoyngoy Collection [2011]
may pahanugot nga gintipik sa mga sinulatan ni Peter Solis Nery sa iya Hiligaynon site.
